يكتبه د/سهير سيد الخبير التعليمي و التربوي
انك تجيبي طفل وتكبريه وتخرجيه للدنيا أمر سهل ومش محتاج مجهود كبير.
انما انك تجيبي طفل وتربيه وتطلعيه إنسان سوي متربي يعرف يتعامل مع المجتمع ويكون عضو فعال ومؤثر وكل الناس تحبه وتحترمه فده أمر صعب ومحتاج منك وقت ومجهود وصبر وفهم وعلم وتشجيع وده اللى بنسميه
التربية الواعية
طيب ازاى أربي طفلي التربية الواعية ؟
بشكل عام، على الآباء والأمهات اتباع القواعد دي اللى يمكن تساعدهم على التعامل بشكل أفضل مع سلوكيات أولادهم، في مختلف الظروف:
•التواصل: اتكلموا معهم كل يوم واحكيلهم حصل ايه فى يومكم ، واحكولهم انجازتكم البسيطه ونفسكم فى ايه للمستقبل ، و اسمعوا ليهم برضو ،ولما تعملوا حاجه غلط او تتعصبوا عليهم أو تنتقدونهم لأي سبب من الأسباب، بادروا بالاعتذار علشان هما كمان يتعلموا يعتذروا لما يغلطوا.
•حطوا القواعد سوا : اتفقوا سوا على رد فعلكم لو ما اتبعوش القواعد، ثم حملوهم المسئولية نتيجة مخالفتهم القواعد بدلا ما تعاقبوهم .
•الاحترام: تأكدوا من أنكم بتسمعوا لهم اكتر ما بتدوهم أوامر ونواهي وأنكم تحترمون آراءهم ومشاعرهم فى أى موقف بيضغط عليهم .
•كونوا قدوة:
الآباء: كن قدوة لابنك فى انك تعرفه ان الرجل المحترم يعامل المرأة باحترام وثقة حقيقيين.
الأمهات: كوني قدوة لبناتك وعرفيهم ان المرأة مستقلة وجزءا لا يتجزأ من أسرتها ومجتمعها.
•الآباء المنفصلون: أبعدوا الأطفال عن النزاع ومتتكلموش بشكل سلبي عن الطرف الآخر أمام الطفل وعرفوهم دائما أن بابا وماما بيحبوكم ولكن بطريقتين مختلفتين.
•الدعم: خليكو دايما جنبهم وشجعوهم هما كله اللى محتاجينه منكم الدعم
اسمحولهم يعبروا عن نفسهم بحرية و دوروا على المواهب اللى عندهم وشجعوهم على تنميتها .
•الحب بدون شروط: تأكد من ان اطفالك بيحبوا يعرفوا انك بتحبهم ولما مش بيحسوا بالحب دة بيحسوا أنهم مش بينتموا لى عائلة، وشعورهم بقيمتهم يتأثر.
ودة من خلال افعال صغيرة زى الحضن و"بحبك " بدون سبب ليها تأثير عظيم .
حطوا خطة لليوم مع أطفالكم:
يحتاج الأطفال في يومهم إلى التنظيم والترتيب والإحساس بالقدرة على الأنجاز والأمن اللي بيجي مع التكرار.
وضع خطة لليوم بيساعدهم على اكتساب العادات، وتعلم إدارة الوقت، وتقليل الحيرة والخناق على اللى مفروض يعملوه و اتأكدوا من أن خطة اليوم فيها وقت للعب ، ووقت للعائلة، و للمساعدة في أعمال المنزل.
أشركوهم في عمل خطة اليوم، وهتلاقوهم بينفذوها طالما هما اللى حاطينها
اكتبوا الخطة في ورقة وعلقوها علشان يعرفوا يتابعوها هما بنفسهم وخلوها مرنة قابلة للتغيير والتعديل، واسمحوا لهم بوقت راحة حر "مش مخطط له " يعملوا فيه اى حاجه عاوزينها .
• تشجيع السلوك الايجابي
امدحوا الطفل لما يتصرف بشكل جيد.
اتفقوا معه على مكافآت بسيطة غير مادية للسلوك الجيد وأعطوها له في كل مرة يقوم بهذا السلوك.
• اذكروا السلوك اللي عاوزينه يعمله: اطلبوا منه الأمر بصيغة " اعمل كذا " مش "متعملش كذا ": مثل من فضلك نظف الطبق اللي أكلت فيه من "بدلا من متبهدلش المطبخ".
•قدموا طلبات واقعية يمكنهم تطبيقها: يعني مينفعش طول اليوم يقعد ساكت وميتحركش لا ، بس ممكن تقعد ساكت لحد ما اخلص تليفون ، كدة طلبك أكثر واقعية.
•لازم تكون التعليمات مباشرة ومحددة ومناسبة للعمر ومقدمة بطريقة هادئة ومهذبة.
•كلفوهم بالمسئوليات المناسبة لأعمارهم: زي تنضيف الترابيزة بعد الاكل ، وغسل الأطباق، وتطبيق ملابسهم النظيفة ووضعها في مكانها، والمساعدة في إصلاح الأشياء التالفة في البيت .
كل دة بيخلق جو يعبر عن مقولة "كلنا في مركب واحد"، وده هيساعدهم أن يكونوا أكثر مسئولية.
فى الاخر اولادنا نتيجة لأفعالنا وافعالنا لازم تبقى ايجابيه تجاههم علشان اما يكبروا تكون افعالهم عشان لما يكبروا تبقي افعالهم إيجابية تجاهنا.
تعليقات
إرسال تعليق