بقلم : د . سهير سيد الخبير التربوي
1️⃣ أفضل مراجعة ليلة الامتحان هي المنهج بالكامل من الجلده للجلده بقراءة سريعه و ليس حل الأسئلة و الامتحانات .. ده هيساعد و هيسهل تذكر المعلومات تاني يوم في الامتحان
2️⃣ النوم من ٦ الي ٨ ساعات ليلة الامتحان مهم جدا .. النوم القليل بيأثر علي الذاكرة و التركيز ..الفطار قبل النزول للإمتحان مهم جدا .. قله السكر في الدم هيقلل التركيز و هيزود التوتر
3️⃣عموما أيام الامتحانات..متعملش حاجه جديده مش متعود عليها .. يعني مثلا متشربش قهوه صباحا و انت مش متعود تشربها .. متاخدش مهديء مثلا عمرك ما اخدته.. ذاكر من نفس المذكرات اللي ذاكرت منها طول السنة .
4️⃣ ادخل اللجنة قبل بداية الإمتحان بوقت كاف و ليس قبل الامتحان علي طول .. أقرأ الأدعيه و الأذكار اللي متعود عليها .. متتكلمش مع حد و متراجعش مع حد .. عشان تحافظ علي تركيزك
5️⃣ نصيحة أنك تقرأ الامتحان كله الاول دي نصيحه مضروبه جدا.. تضييع وقت و هتوترك لو لقيت سؤال مش عارفه أو حسيت الامتحان في مجمله صعب.. امشي سؤال سؤال أفضل
6️⃣ أقرأ السؤال كويس جدا قبل الاجابه.. وضح خطك .. أجل السؤال الصعب للآخر .. وزع الوقت و سيب وقت للمراجعه و لا تخرج أبدا قبل نهاية الوقت .. اقعد للآخر راجع و راجع و اتأكد من اجاباتك
7️⃣ بعد الامتحان .. علي البيت عدل ..متراجعش مع حد و لا مع مدرس و لا مع زمايلك في التليفون .. و متروحش تفتح الكتاب تشوف حليت صح و لا لأ .. اقفل المادة دي و استعد للي بعدها
8️⃣ الأيام اللي بين الامتحانات وزع الماده الجايه عليهم و اعمل حسابك ليلة الامتحان أنك تقرأ المادة كلها زي ما اتفقنا .. و بلاش حل امتحانات الا في مواد المسائل زي الفيزياء و الرياضيات
9️⃣ الأهل دورهم مهم جدا . مطلوب الهدوء .. الدعم .. التشجيع ..لا داعي لأي ضغط .. أكل صحي.. (سمك .. مكسرات.. فاكهة طازه ) ..و الدعاء المكثف
🔟 اعمل اللي عليك و ارضي ضميرك و ارضي ربنا و ارضي أهلك اللي طفحوا الدم عشانك في ظل ظروف قاسيه جدا .. ابذل أقصي ما في وسعك لإسعادهم و اعلم أن الله لا يضيع أجر من أحسن عملا
يارب النجاح و التفوق و الفرحه لكل طلبة الثانوية العامة
تعليقات
إرسال تعليق