كتبت :د. سهير سيد محمد
من أكتر عيوب الميديا أنها خلتنا نشوف كل الأمور من زاوية واحدة و ب frame محدد
و بعد إدمان تصوير الموبيل ، بقينا بنعمل skip لحاجات كتير و نركز بس على نفسنا أو اللى يخصنا و بس
و بعد ما بنصور بنعمل crop عشان نركز أكتر و أكتر على اللى احنا عايزينه و بس
فكروا كده شوية ، هتلاقوا دا بقى نمط عندنا ندور على اللى يخصنا و بس و مش بنأخد بالنا بالأشياء المحيطة
دا بقى بيأثر على نفسيتنا و مزاجنا العام،
بيخلينا نزعل و نضايق من لقطة واحدة حصلت فى يومنا عشان هيه تخصنا و بس ، و ننسى أن فى حياة كاملة محتاجين نشاركها مع أطراف تانية فى حياتنا
مثال: الزوج اللى لو موقف فى شغله حصل ضايقه، يفسد يومه كله فى شغله و لما يروح مع أسرته
مثال: الأم اللى عرفت أن ابنها جاب درجة سيئة فى امتحان ، تفضل تبكى و تحكى عن الموضوع طول اليوم بينها و بين نفسها و مع ابنها و أهلها
مثال: الطفل اللى خرج خروجة طلب حاجة و ما اتنفذتش، فضل عصبى و نكدى باقى اليوم
امثلة كتير لو فكرنا هتلاقى اننا بوعى و بدون وعى بنعملها
و لو حسبنا كم الوقت اللى ضاع عشان وقفنا عند لقطات تضايقنا و تجاهلنا ال surroundings هنندم و نقول يا ريتنا لفينا عينينا و شغلنا عقلنا شوية و خدنا بالنا أن فى فيه جوانب تانية حوالينا حلوة و مفيدة
التدريب على رؤية الحياة بشكل كامل مش سهل بس مش مستحيل
نعمله ازاى ؟
- لما نكون فى اى مكان ، ندرب نفسنا نأخد بالنا من كل الحاجات الموجودة و منركزش على اللى يخصنا و بس
مثال بسيط: لو بنقرا منيو فى مطعم لأول مرة ، ما نرحش على الجزء اللى بنحبه أو نفضله علطول ، بسرعة ممكن نعمل scan لباقى الأطباق
- بلاش نكرر نفس امورنا كل يوم بتفاصيلها المملة
ندى لنفسنا مساحة كل يوم نجرب حاجة جديدة ، نتعلم شيىء جديد، نعرف ناس جديدة ، نجرب أكل أو ستايل لبس جديد
الخلاصة
نوسع كل يوم دايرة رؤيتنا للحياة و معناها و كل ما فيها
عشان عقلنا ما يفضلش واقف فى ادراكه أو تفاعله على لقطات معينة فقط ويعدى العمر من غير ما نأخد بالنا و نتعلم و نستمتع بحاجات كتير رائعة فى الحياة
استمتع بوقتك وحياتك ولا تفسد اللحظات الحلوه.
تعليقات
إرسال تعليق